هه‌واڵ
ڕاپۆرتی تایبه‌ت
سیاسه‌ت
‌‌‌ئابووری
‌فه‌لسه‌فه‌
تیۆری‌
‌ته‌نز‌
ئه‌ده‌ب و هونه‌ر
‌‌‌زانست و ته‌کنه‌ڵۆژیا‌
ده‌سه‌ڵات ‌‌
ئۆپۆزسیۆن
ئه‌نتی کاپیتاڵیزم ‌
‌مقالات عربیة
‌مقالات فارسی‌‌
‌ ‌English articles
‌وه‌رگێڕان ‌
‌کتێبخانه‌
‌‌
<July 2018>
SuMoTuWeThFrSa
24252627282930
1234567
891011121314
15161718192021
22232425262728
2930311234


دوو کوردستانپۆست             



ئەو ڕابەرە گەنجەی جیهانی سەرمایەداری لیبراڵی هێنایە لەرزە !


دوایین فێڵی مێژوویی جه‌لال تاڵه‌بانی – نه‌وشیروان مسته‌فا له‌ کورد " لیستی گۆڕان "ه‌!


ژنی دیکتاتۆرە عەرەبەکان خەریکی چین؟

داڕمانی یۆرۆ، داڕمانی یەکێتی ئەوروپا


Title
خەندەیەک بۆ مەرگ .. فرمێسکێک بۆ ژیان


img10/30/2012 12:00:00 AM
تاهیر ساڵح شەریف:

چوار ساڵە هەروەک دارتووەکەی*جێ ژوانمان دەمرم و زیندوو دەبمەوە .. چوارساڵە دوور لە چاوە ئەستێرەییەکانت.. دوور لە زوڵفی سەوزو شێواوی دارتووەکەی هاوڕێمان ، چاوەکانی چاوەڕوانیم وەک بەژن و باڵای ماندووی ئەو چرۆ دەکەن .. دەپشکون ..سەوز دەبن .. زەرد دەبن و بە خەزانی بێ هیوایی بە دیدارێکی تر لە بینایی دەکەونەوە .. تۆ لەکوێیت و بۆچی ئەم ئێوارەیە دواکەوتیت لە ژوان ؟ من نازانم تۆ لە خەونێکی ئارامی پەمەیی و قوڵ دایت و بە ئاگا نەهاتوویتەوە، یاخود لە نیوە ڕێ دایت و کۆڵی سەنگینی غەم و دەردی ژیانێک، کە بە کۆڵتەوە گرت بوو، هەنگاوەکان و ڕۆیشتنی کەروێشک ئاساتی خاو و کورت کردووەتەوە؟!

چوارساڵە .. ئەم ئێوارەیە بە خۆی و دیمەنەترسناکەکانی یەوە لە پێش چاوەکانی چاوەڕوانیمدا  دووبارە دەبێتەوە ..چەند دیمەنێکی ناشیرین و ترسناکی هەیە ئەم ئێوارەیە ؟!... خۆر لە باوەشی هەورێکی ڕەشی بێ تروسکایی دا خنکاوە .. بروسکە بەسەر زەویدا دەگرمێنێ و سنگی ئاسمان  شەق دەکات.. کانییەکانیش، یەک لە دوای یەک، لەم سەرزەوییە ڕەقەن و درۆزنەوە هەڵ دەقوڵێن ..چاو دەکەنەوە و بە لیتاو و قوڕاوی  گڵی سووریانەوە .. مروارییەکان لە تریفەی مانگەشەو دەشارنەوە .

چەند دیمەنێکی ترسناکە کە لەم ئێوارەیەدا، لە ناو قەدپاڵی ئەویندا بەرەو کانی شاعیرێک مل بنێیت تا تینوێتی بڕینی ئەم هەورازە سەختەی کە لە پێشتدایە بشکێنێت، بەڵام لە بری بۆنی هەڵاڵە و نێرگس، خوێناوێکی بۆگەن و خەست لە پلوسکی شیعری بچۆڕێت .. چەند دیمەنێکی ترسناکە کە  بەم ئێوارە درەنگ وەختە بەرەو باخی چیرۆک  و ڕۆمانەکان بڕۆیت و بتەوێت لەگەڵ پێکی مەی دا شەویان تیا ڕۆژ بکەیتەوە، کەچی دزێکی گۆشەنشینی ناوباخەکانی دراوسێمان بە پۆز لێدانەوە، هەنارە ڕزیوەی ژێر زەردە گەڵا و پووش و پەڵاشی تەڕ بووی بەر بارانی پایزمان وەک بەتامترین میوەی سەرمێزی مەست بوونی ئەم ئێوارەیە پێبفرۆشێتەوە.. یان لەوەش  ترساناک تر، قەسەبەکان و گەلە گورگەکان .. تیاندا کرابنە شوانی مێگەل و بەرخۆلەکانی نزار و پێ دەشتە ڕەنگاو ڕەنگەکانی نیشتمان ....

چەند دیمەنێکی ترسناکە کە ووشە بریقەدارەکان لە پێکی تاڵی دەستی مەستەکانی ناو مەیخانەکاندا  سەر ڕێژ بکەن و بڕژێنە خوار بە سەر پێڵاوی خوێناوی خاوەن سەروەت و سەرۆک و جەللادەکانی نیشتماندا .. چەند دیمەنێکی ناشیرینە کە ووشە هەمیشە زیندووەکان، زیندە بەچاڵ بکرێن و ووشە مردوەکانیش لە پەرتووکخانە تۆز لێنیشتووەکانی چەرخی جەهالەتدا  تاجەگوڵینەیان لە سەر دابنرێن ..چەند دیمەنێکی ترسناکە کە لاپەڕەی سوورو سەوز و زەردی ڕۆژنامەکان بکرێنە تورەکەی ڕەش و بەسەر ووشەکانی حەقیقەتدا بکرێن تا بەرەو سەکۆی سێدارەکان ببرێن، یاخود لەلایەن قازییە بێدەسەڵاتەکانی دادگاکانەوە چەکوشی زیندانی هەمیشەییان بە سەردا بدرێن .. چەند دیمەنێکی ترسناکە کە لە شەوە کورت و درێژەکاندا، یەشار کەمال ببێتە هاوڕێت وتوێشە بەرەی سەنگین ترین ووشەکوردییەکان لە پشت ببەستیت و  بە نشێوی کێوەکاندا هەڵبگەڕێیت تاکاریتە** لەو دیوی چیاوە ببینیت، بەڵام پێش و پاش مەرگیشت، پاداشی دەڵاڵێکی تەمەڵخانە و هەڕاجخانەی  سیاسەت  وەرنەگریت .. چەند دیمەنێکی ترسناکە کە خاوەنی سامانی لە غوربەتدا*** بیت، بەڵام پارەی  پەیمانەیەک**** مەی وپاکەتێک جگەرەو چایەکت لە گیرفاندا نەبێت و بەغوربەتەوە ماڵ ئاوایمان لێبکەیت وپاش ماڵ ئاوایش، خاوەن تەلار و بانکەکانیش لە مەیدانی ئازادی درۆی بەرماڵەکانیاندا پەیکەرێکت لە برۆنز بۆ دروست بکەن ....

  چەند دیمەنێکی ترسناکە کە بێیت لە پێستی داماڵراوی سەرو زوڵفی ڕەش ماری کیژۆڵەیەکی ناسکی پەپولەئاسای ژێر دارو پەردووی کەلاوەکانی ووڵاتەکەت کەمانێک، عودێک و تەپڵێک دروست بکەیت و سروودی ڕزگاری و ئاوەدان کردنەوەی نیشتمان بڵێیتەوە .. چەند دیمەنێکی ترسناکە کە لە تەلی گیتارەکان، پەتی سێدارە دروست بکەیت و بە ئاوازی  ئازادیش، گوێگرانت ڕابکێشیتە ناو هۆڵەکانی سەما کردنەوە .. چەند دیمەنێکی ترسناکە کە بێیت فڵچەکەت لە ڕووباری خوێنی  نەوڕْەس و کەنارییە سەربڕاوەکان هەڵبکێشیت  و لە دڵی وەک پۆڵایین وبێ بەزەیییانەی  ڕاوچییەکانیش ، وێنەی ناسکترین دڵی  دڵدار وعاشقانی ژیان بکەیتە تابلۆی سەر دیواری ماڵە سۆزانی یەکان ....

 چەند دیمەنێکی ترسناکە کە بێیت ولە پەیکەری دایناسۆر و دێوە وێرانکەر و تاڵانکەرەکانی چەرخی نامۆیی و گەدایی، وێنەی فریشتەکان و پەرییەکانی  خێر و بەهەشتی شادی و بنیاتنان لە سەر تاشە بەردی شاخ و پێ دەشتەکانی ووڵاتت هەڵبکۆڵیت  و بتەوێت ئەوانە وەک ئەهرامەکانی فریعەونەکان وپاشماوەی  هونەرە نەمرەکانی سەردەمی شارستانیەتی بابلی و سۆمەرییەکان  بەیادگاری بۆ نەوەکانی ئایندە و مێژوو بەجێ بهێڵیت .. چەند دیمەنێکی ترسناکە کە خۆتی زۆربڵە و هیچ لە باردا نەبووت لێببێتە جیۆردانۆ و کۆپەرنیک و گالیلۆ و پێشەوایانی تری ڕۆژگاری بوژانەوە، بەڵام نیشتمانەکەیشت کەشتییەکی شکاوبێت بە دەم شەپۆلی تاریکی  سەدەکانی ناوەڕاستەوە .. چەند  دیمەنێکی ترسناکە کە وەک فەرهاد قوڵنگی عەشقی شیرین لە دەست بگریت و جەنگ لە گەڵ کێوی سەرکەشی بێستوندا بکەیت ، بەڵام پاش لە مەرگت بەرهەمی ڕەنج و ماندوو بوونیشتت، تەنانەت وەک داستانی شیرین و فەرهاد بۆ نەنووسرێتەوە ...  هەموو ئێوارەکانی ئەم چوارساڵە  .. ئەو دیمەنە ترسناکانە وەک عەشامەتی سەرشۆستەکە بە بەرچاومدا دێن و گوزەر دەکەن، بەبێ ئەوەی کە هیچ  یەکێکیان ڕەنگ و دەنگەکانیان گۆڕابن .. ئاهههههه تۆ لە کوێیت و بۆ لە ژوان دواکەوتیت تا دیمەنەکانی ئەم ئێوارە ترسناکە بە چاوی خۆت ببینیت ؟ .. ئاهههههه ..چەندیمەنێکی مات و ترسناکی هەیە ئەم ئێوارەیە؟....

                                  ***

چوارساڵە .. تۆ لەژێر پەتووی بەردینەوە خەونی سوورو سەوز بە فڕینی پەپوی***** ژیانتەوە دەبینیت و جارجارەیش ئەو دیمەنە ترسناکەت دێتەوە پێش چاو کە گورگە بۆر و موو گرژەکانی دارستانەکەی نزیک ماڵەکەتان لە شەوێکی ئەنگوستەچاودا، بە بێ دەنگی و بە ئەسپایی بە بناری ئەزمڕدا، هێواش هێواش بەرەو  دەرگای هەمیشە لە سەرپشتی ماڵەکەتان هاتنە خوارێ و لە پەلامارێکی لە ناکاو چاوەڕوان نەکراودا  کەڵبەیان لەڕوومەت و دڵی پڕ لە هیواو ئاوات وئارەزووەکانت گیرکرد .. تۆیان لەدەستە ناسک و بێ ئێسقانەکانی پەپوو فڕاند . ئاە ..پەلاماری لەناکاوو ترسەنۆکانەی گورکان بۆ جیاکردنەوەی دەستە ناسکەکانی پەپوولە لەدەستە ڕەنگین و بەسۆزەکانی باخچەی نووسین ، چەند دیمەنێکی  بێ بەزیانە بوو ؟!  ....

 ئازیزەکەی من و هەموو پەپوولەکان ، ئەی تۆ زانیووتە کە ئێستا کەمتیارەکان ڕاوی ئەو گەلەگورگانە دەکەن و من و پەپوولەکانیش قاقا بۆ مەرگی دڕندە خۆ خۆرەکان لێدەدەین ؟!.. تۆ لە کوێیت تائەم  دیمەنە خۆڵەمێشییە خەندەهێنەرە بەچاوی خۆت ببینیت و لە گەڵ ئێمەدا قاقا بۆ دووڕوویی و بێ باری ژیان لێبدەیت ؟

                                    ***

     چوارساڵە زریان و ڕەشەبا، پرچی سەوزی درەختەکان بەخاک و خۆڵ دوکەڵ  و باران خەنە دەکەن .. منیش بەدەم خەوبینینێکی ئاڵۆزەوە، لە ناو گەردەلول و گێژەڵوکەی بیاباندا بەرەو تۆ هەنگاو دەنێم و تۆش بەرە و من .. بەڵام هەر لە چەقی چاوەڕوانیدا چەقیوم و نازانم کە هەستەکان، ئەژنۆکان و هەناوی  من لە کار کەوتوون ، یاخود ئەوانە هەموویان لە جوڵانەوەیەکی تراویلەکە ئامێزدا من بۆ دیدارێکیتر فریو دەدەن ؟ تۆ لە کوێیت و چەند هەنگاوی تر لێم نزیک بەرەوە تا ئەم ئێوارەیەش بە دەم هەڵچوون و توڕەبوون و قاقای پێکەنین و بێ دەنگی چەند چرکەیمانەوە بەڕێ بکەین .. پاشانیش وەک خۆشترین یادگارییەکانی مێژووی هاوڕێیەتیمان لە سەر تابلۆی ئامانجەکانمان بینووسینەوە ؟.. تۆ لە کوێیت  تا لەم ئێوارە ڕوو لە تاریکییەدا گۆرانی غەم بۆ نیشتمانی ماندوو تر لەخۆمان بڵێینەوە ؟ 

چوار ساڵە .. هەموو شەوەکانی تەنهایم دەبنە هەورەگرمە و چاوگ و کانی فرمێسکەکانم دەتەقێنن تا بە جۆگەلەی پێچاوپێچی حەسرەت و نامۆیی دا بگەنە تۆی ڕووبار، بەڵام ئەفسوس هێشتا من ماومەکە بگەمە  کەنار ..هەرچەندە کە ڕێگاکەی من پێچاو پێچ و دوروو درێژیش بوو بێتەوە، بەڵام دڵنیام کە ڕۆژێک دێت..بەبەیەکتر دەگەین.. دەستەکانمان لە گەردنی یەکدی دەئاڵێنینەوە بۆ دواجار .. ئیتر ئەوکات ، پێکەوە  بەرەو دەریا مل دەنێین .. ئیتر ئەو کات  وەک تۆ .. لە ناو ئۆقیانوسی ئارامدا .. بۆ هەتا هەتایە ماندوویی چاوەڕوانیکردنی تۆ و هەموو چاوەڕوانییەکانیتر، لە چاوان و جەستەم جودا دەبنەوە ..ئیتر ئەوکات لەگەڵ ووردە ماسییە سەرئاویلکەییەکان و دۆڵفینەکاندا یاری بە شەپۆلە زیوینیەکانی دەریا دەکەین .. نە تۆ خەمی دووری من لە کۆڵ دەگری و نە فرمێسکەکانی چاوەڕوانی بیناییەکانی  منیش  لێوی گوڵە بێ بۆنەکانی چوار دەورم تەڕ دەکەن ....

ئازیزەکەی من وپەپوولەکان! ..

 ئەگەر ئێستا لە ناو ئەم جەنگەڵە دا، وەک منی ماندوو ، لە ژانی چاوەڕوانی کردندا نوقم بوویتایە، ئەوا دڵنیام کە نامەکەت لە دورگەی نامۆیی ژیانەوە هەر بەم ناونیشانە بۆ دەناردم : خەندەیەک بۆ مەرگ .. فرمێسکێک بۆ ژیان! .

  17ی ئۆکتۆبەری 2003

       Toronto 

*دارتووەکە : مەبەستم ئەو دارەتووە یە کە بەرانبەر بە بیناکەی سەرای شاری سلێمانی یە و زۆربەی ئێوارەکان لە گەڵ ( فەرهاد ) دا ، لە ژێَر سێبەرەکەی دا چاوەڕوانی یەکترمان دەکرد ، ئینجا نازانم ئێستا ئەو درەختە ماوە ، یان ئەویش بەدەم تەوری ئاوادان کردنەوەوە ژیانی کۆتایی پێ هێنراوە ! .

** کاریتە ئەو دیو چیا ـ نووسینی: یەشار کەمال ـ وەرگێرانی شوکر مستەفا.

*** لە غوربەتا: دیوانە شیعری یەکی شاعیر: محەمەد عومەر عوسمانە.

**** پەیمانە: ووشەیەکی فارسی یە و واتای پێکی مەی خواردنەوە دەگەیەنێ. 

***** پەپوو :  مەبەستم لە ( پەیڕەو ) ی کوڕی ( فەرهاد ) ە و زۆرجاران خۆیشی بە ( پەپوو )  بانگی دەکرد .