هه‌واڵ
ڕاپۆرتی تایبه‌ت
سیاسه‌ت
‌‌‌ئابووری
‌فه‌لسه‌فه‌
تیۆری‌
‌ته‌نز‌
ئه‌ده‌ب و هونه‌ر
‌‌‌زانست و ته‌کنه‌ڵۆژیا‌
ده‌سه‌ڵات ‌‌
ئۆپۆزسیۆن
ئه‌نتی کاپیتاڵیزم ‌
‌مقالات عربیة
‌مقالات فارسی‌‌
‌ ‌English articles
‌وه‌رگێڕان ‌
‌کتێبخانه‌
‌‌
<September 2018>
SuMoTuWeThFrSa
2627282930311
2345678
9101112131415
16171819202122
23242526272829
30123456


دوو کوردستانپۆست             



ئەو ڕابەرە گەنجەی جیهانی سەرمایەداری لیبراڵی هێنایە لەرزە !


دوایین فێڵی مێژوویی جه‌لال تاڵه‌بانی – نه‌وشیروان مسته‌فا له‌ کورد " لیستی گۆڕان "ه‌!


ژنی دیکتاتۆرە عەرەبەکان خەریکی چین؟

داڕمانی یۆرۆ، داڕمانی یەکێتی ئەوروپا


Title
وەڵامێك بۆ دواچاوپێکەوتنەکەی نەوشیروان( مەولود ) مستەفا ئەمین


img8/6/2012 12:00:00 AM
وەحید ئەمین:

پێشتر و لەچەند شوێنی جیاوازدا ئاماژەمان بەوەداوە کە مێتۆدو پرنسیپی کاری سیاسی لە باشوری کوردستان، پێشمەرجی کۆیلەبوونە، بۆیە نابینرێت یان ستەمە کە کۆیلەیەك بەندی کۆیلەیەتی بپسێنێت. گەر بەڕێکەوتیش یان گەربەهەڵەش ئەو سنورە ببەزێنرێت، چارەنوسی ئاوێتەی خاك دەکرێت.

دوای پەیامەکانی کاك مەولود مستەفا بۆ هەڵسوڕاوانی گردەکە بەبۆنەی هەڵبژاردنەکانەوە، بۆیەکەمینجار لەشەوی 1 - 8 - 2012 دا کاك مەولود بێدەنگی پساندو بۆ بەڕەواناساندنی چارەسەری هەڵە بە هەڵە و خۆدزینەوە لە تاکە ئەرکی سەرەکی و هەنوکەیی ئەم قۆناغە هەستیارە کە کارکردن و خۆئامادەکردنی خەڵکە بۆ ڕاپەڕینێکی سەرانسەری و لەگۆڕنانی دەسەڵاتی ڕەشی بنەماڵەی بارزانی و تاڵەبانی، کۆمەڵێك چەواشەکاری نوێی داتاشی. بۆ خوێندنەوەی تەواوی چاوپێکەوتنەکەی کاك مەولود لە کەی.ئێن.ئێن کلیکی ئەم لینکە بکە ((

http://sbeiy.com/Detail.aspx?id=10149&LinkID=58

))

لێرەدا من گرنگی بە سێ خاڵی گفتوگۆی چاوپێکەوتنەکەی کاک مەولود مستەفا ئەمین دەدەم.

یەکەم/ قەیرانی ئێستای عێراق 

کاك مەولود لە وەڵامی پرسیارێکی   KNN دا لەسەر قەیرانی ئێستای  دەڵێت " سەرکردایەتی پارتی لە بیست ساڵی رابردودا ستراتیژیەتێکیان هەبوە بۆ ئەوەی حوکمی بنەماڵە لە کوردستاندا بچەسپێنن، ......"

لێرەدا لە کاك مەولود دەپرسین ئەگەر سەرکردایەتی پارتی تەنیا بیست ساڵە ئەوە ستراتیژیان بووە، ئەی هۆکاری شەڕی هەکاری و تەواوی شەرەکانی ناوخۆی سەردەمی شاخ لەسەرچی بوون؟ ئەوە کاك مەولود نیە کە نامیلکەی کارەساتەکەی هەکاری نووسیوەو ئاماژە بەوە دەدات کە بنەماڵەی بارزانی دەیانەوێت تەنیا خۆیان هەبن و بەس؟ ئەی تاڵەبانی مامت بەفیتی ئیبراهیم ئەحمەد لە ساڵی 1966 دا بۆچی لەبارزانی جیابوەتەوە؟ لەسەرەتای دامەزراندنی پارتیەوە کە 16 ئابی ئەم ساڵ 66 ساڵ تەمەنیەتی، بۆ هەمان ستراتیژ لەدایك بووە، بۆیە لێرەدا جێی خۆیەتی کە لە کاك مەولود مستەفا بپرسین کە ئەگەر پارتی لە 46 ساڵەکەیتردا هەمان ستراتیژیان نەبووە، کاری ئەو و تاڵەبانی مامی چی بووە؟ ئایا ئەکرێت کە کەسایەتیەکی گرنگ و سیاسی وەکو کاك مەولود مستەفا چاوپۆشی لە نزیکەی نیوسەدە لەخیانەتی بنەماڵەی بارزانی لەبەرانبەر گەلەکەیدا بکات یان فەرامۆشی بکات؟!

پاشان لە سەر وەڵامی هەمان پرسیار بەردەوام دەبێت و دەڵێت (( لە پەنای ئەم شەڕە دەرەکیەی کە لە نەورۆزەوە لەگەڵ بەغدا دەستیان پێکردوە تائێستا، سەیرکە چەند شتیان جێبەجێ کردوە، مەسەلەی بودجە بە هەمو کەموکوڕیەکانەوە کە نیشانەیەکە لە نیشانەکانی به‌فیڕۆدانی سامانی خەڵک، تێیپەڕاندوه‌، هەڵبژاردنی ئەنجومەنی پارێزگاکانیان پەکخست و دوایانخست، ئه‌نجومه‌نی ئاسایشی نیشتیمانی‌-یان دانا کە پێچەوانەی هەمو ستانداردی جیهانیە،..... یانی خۆلاسە دەسەڵاتێکیان داوەتێ لە سەرو هەمو دەسەڵاتەکانی ترەوەیە، لەسەرو دەسەڵاتی تەشریعیەوەیە، لەسەرو دەسەڵاتی قەزائیەوەیە، لەسەرو دەسەڵاتی تەنفیزیەوەیە، لەسەرو هەمو ئەمانەیشەوە چەند گرێبەستێکی تریان ژێر بە ژێر لەگەڵ تورکیا تێپەڕاند، بۆئەوەی ئەمانە داپۆشن ئەم شەڕە دەرەکیەیان دروستکردوە لەنێوان هەرێم و بەغدا، بەناوی ئەوەوە کە دەبێت هەمومان یەکڕیزی کورد بپارێزین، یەکڕیزی کوردیش لای ئەوان یانی سەرۆکی هەرێم چی وت؛ ئێمەیش بڵێین ئەشەوبیللا راستە و بچین پشتیوانی بکەین و تەئیدی بکەین)).

لێرەدا لەکاك مەولود دەپرسین کاتێك بارزانی و بنەماڵەکەی وەکو شێرپەنجە لە تەواوی جومگەکانی جەستەی خەڵکی کوردستانیان داوەو بەرەو پوکانەوە دەیبەن، ئایا ئەوان کۆمەڵێك چەتەو خائن نین بەگەل و نیشتمان؟ کاتێك بارزانی و بنەماڵەکەی تا ئەو ئاستە ترسناکە پەلاماری ژیانی خەڵك و داهاتەکەی بدەن، ئایا دوژمنی سەرەکی و سەرسەختی گەلی ئێمە لەپێش دەسەڵاتی شۆفێنی تورک، فارس و عەرەب، بارزانی و بنەماڵەکەی نیە؟؟ ئایا تا هەنوکەش کاك مەولود مستەفا، نەتاڵەبانی و نە هیچ سەرکردەیەکیتری کورد بە خائن نازانێت ( لەهاوخەباتیەوە بۆ تەخوین)؟؟ ئایا بەکاربردنی دەستەواژەی یەکڕیزی کورد، دەستەواژەیەکی گەمژانە، بێواتاو پوچ نیە؟؟ ئایا هەربەڕاستی چاکسازی چارەسەرێکی گونجاوە یان ڕاپەڕین و ڕاماڵین سنور بۆ بێباکی ئەوان دادەنێت؟ ئایا کاك مەولود ترسی ئەوەی هەیە کە چارەنوسی خۆی لە ڕاپەڕیندا هەمان چارەنوسی بارزانی و تاڵەبانی دەبێت؟! پێویستە کاك مەولود و گردەکەش ( ئۆپۆزسیۆنی چەواشەکار ) باش ئەوڕاستیە بزانن کە یەکڕیزی کورد لەکن ئۆپۆزسیۆنی ڕاستەقینە لەگۆڕنانی بنەماڵەی بارزانی و تاڵەبانیە، نەك چاکسازی. چاکسازی خەوی نەپساوەی دەستکەوتە لەدەستچووەکانی ئێوەی چەواشەکاری شەرمنن و بەرەو ئاسۆی ڕیسوابونیشتان دەبات.

دووەم / سەفەری مەولود مستەفا بۆ ئێران

کاك مەولود لەوەڵامی پرسیاری  KNN:  " دەڵێت (( ئەگەر دەستوری عێراق وەرگرین؛ هەمو سەفەرەکانی سەرۆکی هەرێم و ئەنجومەنی وەزیرانیش کە دەیکەن بۆ وڵاتانی دەرەوە نا دەستوریە. دوای‌ راپەڕین کە یەکەم ئەنجومەنی وەزیرانی هەرێمی کوردستان دروستکرا، وەزارەتێک دروستکرا بەناوی وەزارەتی هاوکاری و یارمەتی مرۆڤایەتی، ئەم وەزارەتە بۆ ئەوە دروستکرا کە دەوری وەزارەتی دەرەوە ببینێت، بەتایبەتی لەو سەردەمەدا کە هەرێمی کوردستان بوبو بە حکومەتی دیفاکتۆ، لە رێگەی حکومەتی عێراقیەوە نەیده‌توانی پەیوەندی بە دنیاوە بکات، ئەوکاتە چوار دەوڵەتی گەورەی دنیا موافەقەتیان لەسەر ئەوە کرد کە نوێنەرایەتی هەرێمی لێبێت، لەوانە ئەمەریکا و بەریتانیا و فەرەنسا و ئەڵمانیا، دو حیزبە دەسەڵاتدارەکەی ئەو زەمانە کە نیوە بە نیوە حکومەتیان پێکهێنابو، ئەم چوار نوێنەرایەتیەیان دابەشکرد لەنێوان خۆیاندا، دوان بۆ ئەو و دوان بۆ ئەو، بەڵام لە هەر یەکێکیاندا حیزبی مونافیس جێگری دانابو.

ئەو چوار نوێنەرایەتیە لە باتی ئەوەی ببەسترێن بە وەزارەتی هاوکاری مرۆڤایەتیەوە، کە دەوری وەزارەتی دەرەوەی دەبینی، راستەخۆ هەریەکەیان بەسترایەوە بە سەرکردەی حیزبەکەی خۆیەوە، ئەمە بە عەمەلی وەزارەتەکه‌ی‌ کرد بە کارتۆنی، کردی بە شتێک ئەو زەمانە بۆ پەیوەندیکردن بە بەعزێک لەو رێکخراوە بێگانانەی لە کوردستاندا کاریان دەکرد، بۆ واستەکردن و تەعینکردنی سایەقێک، فەڕاشێک، حەرەسێک، شتێکی لەو بابەتانە بە تایبەتی ژیانی خەڵک ئەو سەردەمە زۆر زۆر سەخت بو.

وەزارەتەکەیان کلۆرکرد، پەیوەندییەکەیشیان هەموی بەستەوە بە سەرکردەی حیزبەکەی خۆیانەوە. کە شەڕی ناوخۆیشی بە سەرهات، ئەمە دو نیوە بو، بەشێکی بەر یەکێتی کەوت و بەشێکی بەر پارتی کەوت، ئەمە بو بە نەریتێک لە دامه‌زراوه‌كاندا.

ئێستا حاڵی حازر دوای روخانی سەدامیش، هەردو حیزبی دەسەڵات لەسەر سێ ئاستی جیاواز پەیوەندییان لەگەڵ دەرەوەدا هەیە، ئاستێکیان بریتیە لە وەزارەتی خاریجی عێراق، کە لە کاتی روخانی سەدامەوە تائێستا پارتی ئیحتیکاری کردوە بۆ خۆی، بەشێک لەو سەفارەت و دیبلۆماتانەی بەر کورد دەکەوێت لە بەینی ئەم دو حیزبەدا دابەشکراوە، چەندین سەفیر و قونسوڵ و دیبلۆماتیان لەبەینی خۆیان دابەشکردوە لەسەر ئاستی جمهوریەتی عێراق، لەسەر ئاستی هەرێمی کوردستانیش کە نوێنەرایەتی سەرۆکایەتی هەرێم و نوێنەرایەتی هەرێمیان دروستکردوە، ئەمیش بەشێکیان داوە بە یەکێتی. هەڵبەتە بەشێکی کەمیان داوەتێ، باقیەکەی تر پارتی بۆ خۆی هەڵیگرتوە.

لەسەر ئاستی هەرێمیش نوێنەرایەتیەکیان بۆ خۆیان دروستکردوە لەگەڵ دنیا، کە زۆرتر خەریکی بزنسن لە باتی ئەوەی خەریکی کاری دیبلۆماسی بێت، چونکە هیچیان سیفەتی دیبلۆماسیان نیە.

لەسەر ئاستی سێیەمیش ئەم دو حیزبە لە هەر جێگایەکی دنیا بۆیان کرابێت مەکتەبیان کردوەتەوە و نوسینگەیان کردوەتەوە بۆ پەیوەندیکردن لەگەڵ حیزب و ئەو دەوڵەتانەی لەو وڵاتانەدا هەیە، ئەگەر ئەمە بۆ ئەوان حەڵاڵ بێت، بۆ ئێمەیش حەڵاڵە)).

کاتێك کاك مەولود دەزانێت بە پێی دەستوری عێراق هەمو سەفەرەکانی سەرۆکی هەرێم و ئەنجومەنی وەزیرانیش بۆ دەرەوەی وڵات نادەستوریە، ئەی بۆچی خۆیشی سەرپێچی دەستوری عێراق دەکات و هەمان هەڵەی سەرۆکی هەرێم و ئەنجومەنی وەزیران دووبارە دەکاتەوەو سەردانی ئێرانیکرد؟ یان ویستی تەحەدای هەڵەکانی باڵادەستی و بێباکی بارزانی بە هەڵە وەڵام بداتەوە؟! هزری ئۆپۆزسیۆن بوونی گۆڕان لەکوێی وەڵامدانەوەی هەڵەکانی بارزانیدایە، بەهەڵە ؟

ئایا کاك مەولود مستەفا جێگری سکرتێری گشتی یەکێك لەو دو حزبە دەسەڵاتدارەی ئەو زەمانە نەبوو کە حکومەتی نیوەبەنیوەیان پێکهێنابوو؟ ئەوکاتە مەولود مستەفا نەك تەنیا بێهەڵوسێت بوو لەبەرانبەر ئەوکارانەدا، بەڵکو وەك تاڵەبانی مامی ئاماژەی پێدا کاك نەوشیروان دەیان وەزیرو ئەندام پەرلەمانی داناوە. ئەبێ هۆکاری چی بێت کە کاك مەولود لەسەر ڕێژەی بەرکەوتەی هەڵەکانی ئاستی لێپرسراویەتی ئەو زەمانەی حزبەکەی بەخشکەیی خۆی قوتار دەکات و ئێستاش تانەیان لێدەدات؟

کاك مەولود لەهەموکەس باشتر دەزانێت کە تاڵەبانی و بارزانی و خودی کاك مەولودیش چ لەسەردەمی شاخ و چ لەدوای ڕاپەڕین خاوەنی ڕێبازێك نەبوون کە بەرژەوەندی خەڵك بپارێزێت، لەهەموکەس باشتر دەزانێت کە تەواوی ئاستی پەیوەندیەکانی تاڵەبانی و بارزانی موخابەراتی بووەو تەنیا پاراستنی تایبەتی خۆیانی رەچاوکردووە ( هەفتەی پێشو ماڵپەڕی ئاوێنە ڕووماڵی هەواڵێکی کردبوو کە مەلا بەختیار ئاماژەی بەوەدابوو یەکێتی لەگەڵ 36 دەزگای هەواڵگری جیهاندا یەیوەندیان هەیە و وتبووی دڵنیام کە پارتی زیاتری هەیە ). کاك مەولودو تەواوی خەڵك باش دەزانن کە تاڵەبانی و بارزانی کوردستانیان کردووەتە بنکەو مۆڵگەی ئیتڵاعاتی ئێران، میتی تورکی، موسادی ئیسرائیلی، پیاوەکانی دەزگای سخوڕی بەریتانیا و سی ئای ئەی ئەمەریکی و دەیان وڵاتیتری ناوچەیی و جیهانی. بەواتایەکیتر دروستکردنی پەیوەندی لەوئاستانەدا هیچ پێناسەیەك بۆ تاڵەبانی و بارزانی دەهێڵێتەوە، جگە لە پۆلێن کردنیان لەخانەی کۆمەڵێك خائن و دوژن بەگەل و نیشتمان؟ جا ئەگەر کاك مەولود مستەفا ئەمین بەغیلی بە ڕەوایی و حەڵاڵی خیانەت و سیخوڕی تاڵەبانی و بارزانیەوە لێدێت، ئەوا لەجیاتی جارێك، هەزار جار ئەوەش لە ئێوە پیرۆز بێت و پێشتان حەڵاڵ بێت. ئایا ئەوە مێتۆدو هزری نەگۆڕی چەتەکانی سەردەمی شاخن یان مێتۆدو هزری گۆڕانخوازان؟

سێیەم. کێشەی نەوت و هەڵوێستی گۆڕان

کاك مەولود مستەفا وەڵامی پرسیاری  KNN: دەڵێت :" گەلێک کەس گلەیی ئەوەیان کرد کە ئێمە بۆ ئاشتی هەورامیمان بینیوە؛ ئاشتی هەورامی وەزیری سامانە سروشتیەکانی کوردستانە، نەک ئاشتی هەورامی، هەر وەزیرێکی تر بیەوێت ئێمە ببینن، ئێمە بە خۆشحاڵیەوە پێشوازی لێ دەکەین و دەیبینین و گوێشی لێدەگرین، بەڵام بینینی ئەوانە بەمانای ئەوە نییە کە ئێمە لەگەڵی‌ رێکەوتوین یان لەسەر باری سەرنجی ئەو ره‌زامه‌ندین ".

کاك مەولود وەڵامی گلەییەکەی خەڵکی نەداوەتەوە کە بۆچی ئاشتی هەورامی دیوە! ئێمەش دەزانین ئاشتی هەورامی وەزیری سامانە سروشتیەکانی کوردستانە، بەڵام پرسیار ئەوە بوو بۆچی ئاشتی هەورامی؟ کاتێك هیچ پەیوەندیەکی تایبەتتان لەگەڵیدا نیە، بۆچی سەردانی کردن؟ کاتێك هیچ پۆستێکی فەرمی ئیداری دامودەزگاکانی دەوڵەتتان نیە، بەچ سیفەتێك سەردانی کردن و بۆ چ مەبەستێك بوو؟ ئەی بۆچی تا هەنوکە سەردانی عەلی باپیر یان سەلاحەدین بەهادینی نەکردووە کە هاوبەرەن لەگەڵ ئێوە؟ یان بۆچی تاهەنوکە هیچ یەکێك لەوەزیرانی ئابوری و پلان دانان ( بایز تاڵەبانی )، وەزیری پێشمەرگە ( شێخ جەعفەر )، وەزیری ناوخۆ ( کەریم سنجاریی ) یان هەر وەزیرێکیتر سەردانی نەکردوون؟! بۆچی ئاماژەت بەوردەکاری سەردان ، هۆکار و گفتوگۆکانی خۆتان لەگەڵ هەورامی نەدا؟ یان هیچ نەبێت ئەگەر لەسەر باری سەرنجی هەورامی ڕازینەبوون، بۆچی ئاماژەیەکت بە لێدوانەکەی ئەم دواییەی هەورامی( لینکی لێدوانەکەی ئاشتی هەورامی http://www.hawlati.co/babetekan/21813 ) نەدا کە وتی ئێوە ستایشی کارەکانیتان کردووە؟

لە وەڵامی بەشێکیتری هەمان پرسیاردا، کاك مەولود دەڵێت : ( نوقتەی سێیەمینیان ئەوەیە، کە ئەو کۆمپانیایانە یاخود ئەو بانقانە کە دێن لە کوردستاندا کاربکەن چ لایەنێک دەچێت گرێبەستیان لەگەڵدا دەکات، عائیلەیەک دەیکات، وەزارەتی سامانە سروشتیەکان دەیکات، حکومەتی هەرێم دەیکات، بە ئاگاداری پەرلەمان دەیکات، بە ئاگاداری کێ دەیکات؛ ئەمەش نوكتەیەکی ترە.

نوقتەیەکی تریان ئەوە کە ئەو مەرجانە چین ئەم کۆمپانیا و بانقانە دێن بەسەر کوردستاندا دەیسەپێنن، ئەو مەرجانە چین کە هەرێمی کوردستان دەیەوێت لەو بانقانەی داوا بکات، ئەو مەرجانەی کە هەرێمی کوردستان قبوڵی دەکات تا چ ئەندازەیەک بە قازانجی کۆمەڵانی خەڵکی کورستان و بە قازانجی ئابوری کوردستانە، ئەمەش نوقتەیەکی ترە.

ئەمێنێتەوە سەر ئەوەی داهاتی ئەمە بۆ کوێ دەچێت و چی لێ دەکرێت و چۆن خەرج دەکرێت، ئێمە پێمانوایە ئەمە سیاسەتێکی راستە ئەگەر جێبەجێ بکرێت، بەڵام لە هەمانکاتدا پێمانوایە ئێستا بە خراپترین شێوە پرسی نەوت بۆ مەسڵەحەتی لایەنێک بەکاردەهێندرێت، وە ئێمە نازانین داهاتی نەوت چی لێبەسەردێت و چۆن خەرجدەکرێت، ئومێدمان وایە ئەمەش راستبکرێتەوە. )

سەیر لەوەدایە کە خودی کاك مەولود ئاماژەی بەوداوە کە عائیلەی بارزانی گرێبەستە نەوتیەکان دەکەن و تەنیا ئەوانیش لێی ئاگادارن ( ئەگەرنا بۆچی ئاماژەی بە وشەی عائیلەیەك داوە؟ )، هەروەها ئاماژەی بەوەداوە کە ئێستا بە خراپترین شێوە پرسی نەوت بۆ مەسڵەحەتی لایەنێک ( واتە پارتی ) بەکاردەهێندرێت، کەچی لەهەمانکاتدا دەڵێت ئێمە نازانین داهاتی نەوت چی لێبەسەردێت و چۆن خەرجدەکرێت. ئایا هەر بەڕاستی ئەوە مەتەڵە یان ترسنۆکی؟ ئەوە گەوجیەتیە یان هونەی چەواشەکاری؟ کاتێك تەنیا بارزانی و بنەماڵەکەی ئاگاداری کۆنتراکتە نەوتیەکان بن، کاتێك تەنیا ئەوان ئیمزای گرێبەستەکان بکەن، کاتێك تەنیا ئەوان بڕی نەوتی فرۆشراو، نرخەکەی، لایەنی کڕیارو بڕی داهاتەکەیشی بزانن، دیارە هەر ئەوان داهاتەکەیشی وەردەگرن و لوشیشی دەدەن. ئێوەش هەر بەشەرمەوە بەردەوامبن لە ڕێبازی بێکێشەی چەواشەکاری شەرمنی و ئومێدی ڕاستکردنەوەش بە ئاوات بخوازن!!

ماوە بڵێم کاکە مەولود ئەبێ ببوریت کە ئێمە لەسەر یەك هێڵ و بەیەك چاو سەیری تاڵەبانی، بارزانی و خودی کاك مەولودیش دەکەین. تاکە ڕقی ئەستوری ئێمە لەبەرانبەر کارەناڕەواکانی ئێوەدا کەگەوجکردنی خەڵك و بەلاڕیدابردنیانە بۆ لاسەنگکردنی تای تەرازووەکە لەبەرژەوەندی تاڵەبانی و بارزانی دیکتاتۆردا. ئێمە یەك ستراتیژمان لەبەرانبەر ئێوەدا هەیە، ئێوە سێڕووی ناشیرینی یەك دراون کە بە تەریب دەڕۆن، گەلی ئێمە کاتێك هەناسە دەدات کە خۆتان و مێژوە پرشنگدارەکەتان بخریتە زبڵدانەوە. ئەوە بەڕێزتانن دنیای ڕۆژنامەوانی کوردی بەرەو بازاڕی شێواو ئاراستەو ئیدارە دەکەن. گەر نا دەیان شتی دژەیەك لە چاوپێکەوتنەکەتدا هەیە، بەڵام لە لەشکرێك پێنوسی کرچوکاڵ و بێبڕشتی کۆیلە کەسێك جورئەتی ئەوەش ناکات ڕەخنەیەکت ئاراستە بکا. ئێمە زۆر بەوردی جاودێریتان دەکەین و گوێشمان گران نەبووە، بۆیە پێیشتان دەڵێین بێدەنگ بوون، چونکە لەسەر پرسی نەوت، وەڵامەکەت هیچی نوێی تێدا نەبوو و هەر هەمان ناوەرۆکی سێ وتاری خالد رەزای خوشکەزاتە کە دڵنیام نوسینی خۆتەو بەناوی خالدەوە دابەزینراوە یان هیچ نەبیت تەواوی ئایدیاو داتاکانت داوەتێ ( ئەوەش لینکی نوسینەکانی خالد رەزایە  ):

 http://sbeiy.com/article_detail.aspx?ArticleID=3479&AuthorID=15

http://sbeiy.com/article_detail.aspx?ArticleID=3528&AuthorID=15

http://sbeiy.com/article_detail.aspx?ArticleID=5812&AuthorID=15

 

3 - 8 - 2012