ڕونکردنەوەیەک لە کوردستانپۆست ئینفۆوە دەربارەی ئەم گفتوگۆیە :
ئەم گفتوگۆیە لەگەڵ " عەبدولوەهاب عەلی "، وتەبێژی ئەنجومەنی سەرکردایەتی پارتی لە سلێمانی، لەلایەن کەسێک، یان ڕەنگە بڵاوکراوە و گۆڤارێک بێت ئەنجامدراوە بە ناوی " نها ٢٤ " ئەگەر ئەمە گۆڤار یان بڵاوکراوەیەک بێت، ئێمە هیچ زانیارییەکمان دەربارەی نییە و لە گوگڵیشدا سێرچمان بۆ ئەو ناوەکرد هیچ زانیاریەک بەدەستنەهات . ئەم کەس، یان بڵاوکراوەیە، هاوکار، یان پەیامنێری کوردستانپۆست ئینفۆ نییە . ئەو کەسە ئەم بابەتەی بۆ ئێمە ناردووە و ئێمەش لەبەر ئاگادارکردنی خەڵکی کوردستان لە هەڵوێستی پارتی لەسەر ڕووداوەکەی ١٧ی شوباتی ٢٠١١ ئەم بابەتە وەک خۆی بڵاو دەکەینەوە و هیچ کۆمێنتێکی خۆمانی لەسەر نادەین ئەوە بەجێدەهێڵین بۆ ئەوکەسانەی کە دژی ئەم هەڵوێست و دەربڕینانەی عەبدولوەهابن . لە هەمانکاتدا ئێمە بەرپرس نین لە کەم و زیادکردنی قسەکانی وتەبێژەکەی پارتی . لای ئێمەوە هیچ دەستکارییەکی نەکراوە و وەک ئەوەی کە بۆ ئێمە نێردراوە بڵاومانکردۆتەوە .
عەبدولوەھاب عەلی وتەبێژی ئەنجومەنی سەرکردایەتی پارتی لە سلێمانی، باس لە رۆڵی حزبەکەی لە پێکھێنانی حکومەتی عێراق و، ئاڵوگۆڕی پۆستەکانی ھەرێم بەپێی رێککەوتننامەی ستراتیژی پارتی و یەکێتی دەکات، ھاوکات لەبەشێکی تری چاوپێکەوتنەکەدا، بەوردی باس لە روداوەکانی ١٧ شوبات و ھۆکارو کاردانەوەو دەرنجامەکانی ئەو روداوانە دەکات و ئاماژە بەوەشدەکات، لایەنەکانی ئۆپۆزسیۆن رۆڵی سەرەکیان ھەبووە لە پەلاماردانی لقەکانی پارتی لە سلێمانی و ناوچەکانیتر.
نھا٢٤: ئێستا بەراورد لەگەڵ رابردوو ھەندێک گۆرانکاری لە ناوچەکەدا دەگوزەرێت، پارتی لە کوێی ئەو گۆڕانکاریانەدایە؟
عەبدولوەھاب عەلی: لە راستیدا پارتی ئەکتەری سەرەکی ھەموو ئەو رووداوانەیە، ھەموو ئەو پێشھات و گۆڕانکاری و ڕەوشەی ھەیە، چ لە ئاستی عیراق چ لە ئاستی ھەرێمی کوردستان و وڵاتانی ناوچەکەو دەرەوەی ناوچەکە، پارتی بەو پێیەی حزبێکی گەورەی ئەم کوردستانەیە، سەرکردایەتی ئەم حزبە سەقفێکی مێژوویی دورودێژ لە پشتیەوەیەتی، ئەزموونێکی دورودێژی ھەیە لە سەرکردایەتی شۆرش و ھەروەھا ئەکتەری سەرەکی میژوویی ھەبووە وەک بارزانی نەمرو ئێستاش کاک مەسعود، ئەم حزبە قەدەری وابووە ھەمیشە لە پێشەوەی بزافی رزگاری خوازی کوردەوە بووە، بەھەموو بەشەکانی و دەستکەوت و کەمو کوڕیەکانیەوە قەدەری پارتی وایە دەبێت سەرکردایەتی بزونتەوەی رزگاریخوازی کوردی کردبێت، لەم ھەرێمە و تەنانەت لە ئاستی پارچەکانی تریش، بۆیە ئەگەر سەیر بکەین بە قەد گەورەیی خۆی پارتی بەئامانجگراوە، چونکە پارتی گەورەیە و ئەکتەری سەرەکی ئەم رووداوانەی ئەم دواییەیە، بۆیە توانج و قسەو رەخنەکان زیاتر یەخەی پارتی دەگرن، ھەمیشە کە گەورەبویت و دیار بوویت، دەبێت کارەکانیشت گەورەو دیار بێت، رەخنەکانیش زیاتر تۆ دەگرێتەوە، وەک لای خۆمان دەڵێن ئەگەر ھەر ناوبانگێکت ھەبوو دەبێت بە قەد ئەو ناوە قوربانی بدەی.
نھا٢٤: لەماوەی رابردودا لایەنە سیاسیەکانی عیراق رووبەرووی قەیران بوونەوە، حزبەکەتان کاری کرد بۆ ریکەوتنی ئەو لایەنانە، دەکرێت لەسەر ئەوە قسەمان بۆ بکەی؟
عەبدولوەھاب عەلی: پارتی لە ڕێگەی کاک مەسعودەوە رۆڵی بینیووە کارەکتەرو کاریگەری و شەخسیەتی کاک مەسعود بارزانی زیاتر لە پارتی رۆڵەکەی بینییوە، بۆیە ھەمیشە دەڵێین کاک مەسعود لە پارتی گەورەترە، بۆچی گەورەترە؟ ھێزی مێژوویی ئەو ئەزموونەی لەپشت ئەم پیاوەوەھەیە وای لێدەکات ھەمیشە پێگەیەکی تایبەتی بدرێت و خەڵک حساب بۆقسەکان و بڕیارو ئاڕاستەو بۆچوونەکانی بکات. زۆرکەس ویستیان ئاڵای کوردستان ھەڵکەن، زۆرکەس باسی مافی چارەنوسیانکرد، بەڵام کە کاک مەسعود باسی کرد زۆر زیاتر دەنگی دایەوە.
نھا٢٤: پێت وایە پارتی ئەو کارەی کرد؟
عەبدولوەھاب عەلی: بەڵی پارتی ھاوکاری سەرۆک بارزانی بوو.
نھا٢٤: رۆڵی حزبەکانی تر دەسڕنەوە؟
عەبدولوەھاب عەلی: نا، تۆ باسی تەنگژەکەی عیراقت کرد، دەستپێشخەرییەکەی سەرۆک بارزانی ئاکامەکەی دروست بوونی پەرلەمان و حکومەتی لێ کەوتەوە، شەخسی سەرۆک بارزانی لەوێدا روڵی گرنگی بینیووەو کارەکتەری ئەوە کە کاریگەری ھەیە لەسەر ھەموو سەرکردەکانی عیراق، کە بە قسەیانکردو و ھاتن و کۆبوونەوە، دەتوانم بڵێم بەزۆر وڵاتی ئیقلیمی گەورە ئەو کارە نەکرا، بە زۆر وڵاتانی عەرەبی نەکرا، تا ئەو رادەیەی باراک ئۆبۆماو جۆبایدن پەنایان ھێنا بۆ سەرۆک بارزانی، ئەمانە چەندین جار تەلەفونیان بۆ دەکرد تا بتوانێ دەسپێشخەرییەکەی سەربخات و پشگیری بکەن، سعودییە بە ھەموو توانای خۆیەوە نەیتوانی سەرنجام ھەموویان پشگیری موبادەرەکەی سەرۆک بارزانیان کرد. سەرۆک بارزانی توانی سەربکەوێت و موبادەرەکە سەربخات و حکومەت دروست ببێت وعیراق لە ساڵێکی بێ حکومەتی رزگار بکات، ئەوە ھێز و شارەزایی و ئەزموونی سەرۆک بارزانییە کە وایکرد سەرکردەکانی عیراق کۆبکاتەوەو ئەو رێکەوتنە ئیمزا بکەن، بیگومان لە ھەمان کاتیشدا نابێت ئەوەمان لەیاد بچێت کاک مەسعود سەرۆکی ھەرێمە، راستە سەرۆکی پارتی دیموکراتی کوردستانە، بەڵام لەگەڵ ئێمە کۆمەڵێک حزب ھەیە لە پێشیانەوە یەکێتی نیشتیمانی کوردستان کە ریکەوتنی ستراتیژیمان لەگەڵی ھەیە و پێمان وایە ئەوانیش ھاوکاری ئێمە بوون بە تایبەتی شەخسی جەنابی مام جەلال زۆر ھاوکاری سەرۆک بارزانی بوو بۆ سەرخستی دەسپێشخەرییەکە، ئەویش لە بەغداد زۆر خەریک بوو وەک چۆن مام جەلال ئێستا لە بەغداد خەریکەو کاک مەسعود لێرە ھاوکاریەتی بۆ ئەوەی بتوانن وەک دوو سەرکردەی کورد و دوو بەرپرسی گەورە عیراق رزگار بکەن لەو تەنگژەیەی ئێستا تێیدایە.
نھا٢٤: ئێوە لەگەڵ یەکێتی رێکەوتنی ستراتیژیتان ھەیە، بەڵام لە زۆر شوێن دەبیستین ئەو رێکەوتنە کاتی بەسەرچووە، یەکێتیش رایگەیاندووە بە جیا بەشداری ھەڵبژاردنەکانی پارێزگاکان دەکات، ھەرچەندە پارتی لەم رووەوە قسەی روونی نییە، ھەروەھا بەشێک لە میدیا ئەھلییەکان دەڵێن ئەم رێکەوتنە ئەوەندەی رێکەوتنێکی ئابورییە،رێکەوتنێکی سیاسی نییە.
عەبدولوەھاب عەلی: ئەوانەی دەڵێن ئەمە رێکەوتنی نێوانی دوو بنەماڵەیە یان بۆ بەرژەوەندی ئابورییە ئەوە بۆچونی خۆیانە، رێزمان بۆ بۆچونەکانیان ھەیەو خۆیان چۆن بیردەکەنەوە ئازادن، بەڵام بەلای ئێمەوە رێکەوتنێکی ستراتیژییەو رێکەوتنێکی گرنگە، ئێمە وەک پارتی پێویستمانە و یەکێتیش پێویستی پێیەتی ، کورد و ئەزموونەکەش پێویستی پێیەتی ، ئەمە لای ئێمە لای کەسێکی تر یان کەسایەتییەک یان میدیای ئەھلی پێی وایە ئەم رێکەوتنە بەسەرچووە یان باوی نەماوە، یان گرنگی و کارتێکردنی نەماوە ئەوە بۆچونی خۆیانەو ئێمە رێز لەو بۆچونە دەگرین. ئێمە کە رێکەوتن دەکەین پێمان دەڵین بۆ یەک دەگرن، کە شەڕمان دەکرد دەیانوت بۆ شەڕ دەکەن، کە کێشە دەبێت دەڵێن یەکێتی و پارتی کێشە کەوتە نێوانیان، کە رەخنە لەیەک دەگرین دەڵێن شەڕیان دەست پێکردووە، ئێمە نازانین گوێ لە کامیان بگرین و چی بڵێین، لەبەرئەوە بریارمانداوە بەردەوامبین لەسەر رێکەوتنی خۆمان و بەگرنگی دەزانین و کاریش دەکەین بۆ ئەوەی بەردەوامبێت.
نھا٢٤: بەپێی رێکەوتنە ستراتیژەکە دەبێت ئەم دوو حزبە تا ساڵی ٢٠١٤ بۆ ھەموو ھەڵبژاردنێک پێکەوە بە لیستێک بەشداری بکەن، بەڵام یەکێتی بڕیاریداوە بەلیستێکی سەربەخۆ بەشداری ھەڵبژاردنی ئەنجومەنی پارێزگاکان بکات ؟
عەبدولوەھاب عەلی: ھیچ شتێک لە بارەی ھەڵبژاردنەکەوە دیار نییە، ئاخۆ کراوەیە یان نیمچە کراوە دەبێت، بە شێوازی لیست دەبێت یان لەسەر بنەمای تاک دەبێت، لەبەرئەوە ھەرچی لە میدیادا دەوترێت ئێستا بۆچونی تایبەتی خۆیانە، نەپارتی بریارداوە لەگەڵ کێ دادەبەزێت و لەگەڵ کێ دانابەزێت، شێوەو شێوازی چۆن دەبێت نە یەکێتی، ئایا پێکەوەدەبین؟ چەند لیست دەبین؟ کێ و کێ پێکەوە دەبین؟ ھیچ بریارێکی لەسەر نەدراوەو کەسیش نازانێ مانگی ٩ ھەڵبژاردن دەکرێت یان نا.
نھا٢٤: لەسەر ئاڵوگۆری سەرۆکایەتی حکومەت، لەمیدیاکان قسەیەک ھەیە کە پارتی دەست بەکاربوونی نێچیرڤان بارزانی دەخاتە دوای ١٧ شوبات لە ترسی دووبارە بونەوەی خۆپێشاندانەکان وەک دەبینرێت لەئێستادا لە تۆڕە کۆمەڵایەتیەکان بانگەشەی بۆ دەکرێت ئەم بۆچونە تاچەند راستە؟
عەبدولوەھاب عەلی:ساڵی پار کە لە ١٧ شوبات خۆپیشاندان دەستی پێکرد، پۆستی سەرۆکی ھەرێم وجێگری سەرۆکی حکومەت و سەرۆکی پەرلەمان لای پارتی بوون، بۆ بیخەینە پاڵ یەکێتی؟ من نازانم بۆچی؟ موئامەرەکە دژی پارتی بوو ئەگینا ئێمە نایخەینە سەر یەکێتی و ئێمە ھێزێکی ھاوبەشین لە حکومەت و لە پەرلەمان، بۆیە دواکەوتنی پێکھێنانی کابینەی حەوتەم مەسەلەیەکی تەکنیکییە، کاک نێچیرڤان لێرە نەبوو جەنابی مام جەلالیش نەگەڕابووە ئەو کاتە تا جێگری سەرۆکی حکومەت دیاری بکرێت.
نھا٢٤: بەڵام بەرھەم ساڵح دوو جار لە راگەیاندنەکانەوە داوای دەکرد پارتی زوو ئەو پۆستە وەربگرێتەوە.
عەبدولوەھاب عەلی: د. بەرھەم لە مانگی ئەیلولەوە نامەی دەست لەکارکێشانەوەی پێشکەش کردووە، ئەوە پەیوەندی بە شەخسی خۆیەوە ھەیە، دوای ئەوە نۆرەی پارتی و یەکێتی بوو کە کاندید بۆ پۆسەکان دیاری بکەن، خۆی ئەو کاندید کردنانە دوا کەوت. ماوەیەکی تازەیە جێگری سەرۆکی حکومەت دیاریکراوە دەبێت سەرۆکی ھەرێم رایان بسپێرێت بە پێکھێنانی کابینە، ئیتر ھیچ پەیوەندی بە ١٧ی شوباتەوە نییە.
نھا٢٤: باسیش لەوە دەکرا کە نامەکەی بەرھەم ساڵح نەگەیشتووە بە سەرۆکایەتی ھەرێم.
عەبدولوەھاب عەلی: نامەکەی د.بەرھەم لە راستیدا زۆرتر روو لە حزبەکەی خۆی بوو، تەنانەت ئەگەر کابینە بەدەست یەکێتیەوە بمایە دکتۆر بەرھەم لە حکومەتدا نەدەما.
نھا٢٤: بەپێی رێکەوتنی ستراتیژی دەبوو دوو ساڵ حکومەت لای پارتی بێت و دوو ساڵ لای یەکێتی، لەکابینەی پێنج یەکێتی لەو مافەی خۆی خۆش بوو، دەکرێت بزانین بۆ پارتی لە کابینەی شەش نەیتوانی لەو مافە خۆشبێت؟
عەبدولوەھاب عەلی: مەسەلەکە ئەوە نەبوو لەو مافە خۆشدەبین یان نا، کاتێک برادەرانی یەکێتی وتیان کابینەکە رادەست دەکەینەوە ئێمەش وەرمانگرتەوە.
نھا٢٤: واتا یەکێتی وتی کابینەکەتان دەدەینەوە؟ پارتی داوای نەکردبوو؟
عەبدولوەھاب عەلی: ئیستسحقاقی ئێمە بە پێی رێکەوتنی ستراتیژی، ئەوەیە وەریبگرینەوە ئەوانیش بڕیاریاندا کە کابینەکە رادەست بکەنەوە.
نھا٢٤: بەڵام بۆ کابینەکەی پێنجەمیش ھەر وابوو بە نیسبەت یەکێتییەوە؟
عەبدولوەھاب عەلی: ئەوە بارودۆخێک بوو، مام جەلال پێی خۆش بوو کاک نێچیر بەردەوام بێت و پێی وابوو کابینەکەی سەرکەوتوەو بڕیارێکی جەنتڵمانانەی مام جەلال بوو، ئێستا کە یەکێتی بریاریداوە کابینەکە تەسلیم بکاتەوە وپارتی وەریگرتۆتەوە شتەکە ئاسایی دەڕوات.
نھا٢٤: بۆ تۆمەتبارانی ١٧ی شوبات، ئیوە زۆرجار پێتان وابووە دەبێت یاسا سەروەربێت، بەڵام بۆچی ئەوانەی کە تۆمەتبارن لە رووداوەکەی ١٧ی شوبات رادەستی دادگای ناکەن، لەکاتێکدا لەم ڕوەوە گلەیی زۆرتان لێدەکرێت؟
عەبدولوەھاب عەلی:رووداوەکەی ١٧ی شوبات لە گردبوونەوەک دەستی پێکرد بەناوی پشتیوانی لە شۆڕشی میسر و لە بەردەکی سەرا مۆڵەتی یاسایی بۆ وەرگیرابوو، بەڵام دواتر دەرکەوت شتی تری لە پشتە یەکێکیان سیاسی بوو کە دواتر دەرکەوت، دووەمیان خەڵکانێک بوون کە داوای خزمەتگوزاریان دەکرد، ئێمە ئەم دوو جۆرە خەڵکە لە یەک جیادەکەینەوە، ئێمە داواکاری خەڵک بۆ خزمەتگوزاری بەڕەوا دەزانین و رێز و حورمەتمان بۆیان ھەیە، گوێشیان لێدەگرین، بەڵام لەو گردبوونەوەیەوە کۆمەڵێک خەڵک بە وێنەی سەرۆک بارزانی و جامانەی سورەوە لە بەردەرکی سەراوەو بە شەقامی مەولەویدا دێن بەسەر کۆمەڵێک فەرمانگەی حکومیدا تێدەپەرن و، بەردێک ناگرنە ھیچ شوێنک و پەلاماری لقی چوار دەدەن، بۆچی؟ مەسەکە چی بوو، بۆ لە ھەموو شوێنێک پەلاماری لقەکانی پارتی و یەکێتی قوتابیان دەدرا؟
نھا٢٤: بەڵام ھێرش کردنەسەر یەکێتی قوتابیان رۆژی دواتر بوو.
عەبدولوەھاب عەلی: نا ئەوە ھەموو گرێدراوە بە یەکەوە، ئەو ڕۆژە ھێرش کرایە سەر یەکێتی قوتابیانیش، دوای ئەوەش لە بەردەم لقی چواردا رێژوان بەڕەحمەت بێت شەھید کراو پێمان ناخۆشە خۆزگە وا نەبوایە، بەڵام کاتێک تۆ تەقەت لێدەکرێت مافی مرۆڤیش ھەقی بەرگریت دەداتێ.
نھا٢٤: بەڵام دەڵێن لەلایەن خەڵکەوە تەقە نەکراوەو تەنھا خۆپیشاندان و قسەکردن و بەرد باران بووە؟
عەبدولوەھاب عەلی: نا ئێمە لە ھەولێرو سلێمانی لیژنەی لێکۆڵینەوەمان بۆ پێکھێنا، دەرکەوت شوێنی ١٣ فیشەک بە بینای لقەوە بوو، پاشان ئەو ھەموو بەردەیان لە کوێ ھێنا؟ وێنەو جامانەی سوریان لە کوێ بوو لەو کاتەدا کە دەیان سوتاند؟ رۆژانی داھاتوو دەریخست ئۆپۆزسیون بە چەک و پارەو میدیایان تەرخانکردبوو بۆ لێدان لە دەسەڵات بە تایبەت یەکێتی و پارتی و بە تایبەتی تریش پارتی، ئێمە ھەر کەس یاسا داوای بکات ئامادەین رادەستی دادگای بکەین وملکەچین بۆ یاسا، بەڵام ئەی ئەوانەی ھانی دان؟ ئەوەی چەک و پارەی تەرخانکردبوو بۆ ئەوەو بەمیدیاکانی خەڵکی ھان دەدا؟ ئەوەی وێنەو جامانەی سوری خستبووە ناو گیرفانی ئەو گەنجانە تا بیسوتێنن؟ لە یاسادا ئەو ھەقەت ھەیە یەکێک ھاتە سەر ماڵەکەت و دەستدرێژی کردەسەرت بەرگری بکەی، ئاخۆ بەردەرکی سەرا ھاتوو بۆ لای لق یان لق چووبو بۆ بەردەرکی سەرا؟ ئێمە چووینە سەراو خەڵکمان ھاندا؟ خەڵک ھاتوەتە سەر ئێمە، لە ماڵی خۆمان دانیشتووین خەڵک ھاتووە بمانکوژێت ئێمە وێنەمان لایە تەقە لە لق دەکرێت، دەبێت بزانرێت ئەو تەقانە کێن؟ لەبەرئەوە ئێمە دەمانەوێت سەرجەم کەیسەکە پێکەوەبێت و بکرێتە یەک پاکێج.